Tue. May 26th, 2020

Dina Anjal News

World Top Tamil News Website – Dina Anjal News

கிசான் கிரெடிட் கார்டு பெறுவது எப்படி?

1 min read

 

விவசாயிகள் குறைந்த வட்டியில் கடன் பெற  கிசான் கிரெடிட் கார்டுகளுக்கு விண்ணப்பிப்பது எப்படி?

 

பொருளாதார ஊக்கத் தொகையின் முக்கிய பகுதிகளாக சிறு, குறு, நடுத்தர நிறுவனங்கள், விவசாயிகள், சுய தொழிலாளர்கள், வரி செலுத்துவோர் என பல சாராருக்கும் மத்திய நிதியமைச்சர் நிர்மலா சீதாராமன் முக்கிய அறிவிப்புகளை வெளியிட்டார். அப்போது, கடந்த இரண்டு மாதங்களில் சுமார் 25 லட்சம் விவசாயிகளுக்கு மத்திய அரசு கிசான் கிரெடிட் கார்டு (விவசாயிகளுக்கான கடன் அட்டை) வழங்கியுள்ளதாக அவர் தெரிவித்தார். மேலும், 2.5 கோடி விவசாயிகளுக்கு புதிய கிசான் கிரெடிட் கார்டுகள் வழங்கப்படும் எனவும் அவர் தெரிவித்தார்.

இந்த கிசான் கிரெடிட் கார்டுகள் மூலமாக விவசாயிகளுக்கு ரூ.2 லட்சம் கோடி வரை வழங்கப்படும் என நிதியமைச்சர் நிர்மலா சீதாராமன் தெரிவித்துள்ளார். கிசான் கிரெடிட் கார்டு மூலம் உத்தரவாதமில்லா கடன்கள் குறைந்த வட்டியில் வழங்கப்படுகின்றன. கிசான் கிரெடிட் கார்டுகளுக்கான செயல்முறை கட்டணங்கள் (processing fee) உள்ளிட்ட பல்வேறு கூடுதல் கட்டணங்களை மத்திய அரசு ஏற்கெனவே ரத்து செய்துவிட்டது. கிசான் கிரெடிட் கார்டு மூலம் பெறப்படும் கடனுக்கு தற்போது மூன்று மாதங்களுக்கு வட்டியும் தள்ளுபடி செய்யப்பட்டுள்ளது.

இத்திட்டத்தின் கீழ் 2 விழுக்காடு வட்டிக்கு கூட கடன் வழங்கப்படுகிறது. விவசாயம், வேளாண்மை சார்ந்த எந்தவொரு நபரும் கிசான் கிரெடிட் கார்டுகளுக்கு விண்ணப்பிக்க தகுதியானவர்கள்தான். மற்றவர்கள் நிலத்தில் விவசாயத் தொழில் செய்யும் விவசாயிகளும் இதற்கு விண்ணப்பிக்கலாம். 18 முதல் 75 வயது வரம்பிலானவர்கள் மட்டுமே விண்ணப்பிக்கத் தகுதியானவர்கள். 60 வயதுக்கு மேற்பட்டவர்களுக்கு துணை விண்ணப்பதாரர் கட்டாயம் அவசியம்.

கிசான் கிரெடிட் கார்டை பெற ஸ்டேட் பேங்க் ஆஃப் இந்தியா, ஆக்சிஸ் பேங்க், இந்தியன் ஓவர்சீஸ் பேங்க், ஹெச்டிஎஃப்சி பேங்க் என உங்களுக்கு விருப்பமான வங்கியை தேர்ந்தெடுத்து அந்த வங்கியின் இணையதளத்தில் விண்ணப்பத்தை டவுன்லோட் செய்து ப்ரிண்ட் எடுத்துக்கொள்ள வேண்டும். விண்ணப்ப படிவத்தை பூர்த்தி செய்து ஆதார் அட்டை, பான் அட்டை, 100 வேலை திட்ட அட்டை, வாக்காளர் அட்டை போன்ற ஏதேனும் ஒரு ஆவணத்துடன் சேர்த்து, நில ஆவணங்கள், பாஸ்போர்ட் சைஸ் போட்டோ, கூடுதலாக வங்கி கேட்கும் ஆவணங்களுடன் வங்கிக் கிளையில் சமர்ப்பிக்க வேண்டும்.

கடன் தொகைக்கு ஒப்புதல் அளிக்கப்பட்டவுடன் விண்ணப்பதாரரின் வீட்டிற்கு கிசான் கிரெடிட் கார்டு அனுப்பப்படும். இதன்படி, கார்டு உரிமையாளர்கள் தங்களுக்கு தேவையான பொருட்களை வாங்கிக் கொள்ளலாம். கடன் தொகைக்கு மட்டுமே அரசு வட்டி வசூலிக்கும்

Leave a Reply

Your email address will not be published. Required fields are marked *